الموضوع: استفسار ... بخصوص مكاتب تجيب قبول بالرياض !

مساكم الله بالخير أنا أبحث عن مكتب في الرياض متخصص في مراسلة الجامعات في كندا والبحث عن القبول وكل شيء بحقه ياليت من عنده خبر أو علم يدلنا عليه ولكم تحياتي

مساك الله بالنور والسرور


اخوي البلسم

انا اقول ابعد عن الشر وغنيله

هالمكاتب ما عندها الا الدجه

ولا فيه أي فايده

وان جابو لك قبول بين قوسين ( بعد شهرين ) يا يحطوك بديره مافيها شيء ولا جامعه مو معترف فيها

انتبه وانا اخوك واسمع نصيحه اخوك لتصبح من الشطار

ترا هالمكاتب راس مالها انت واللي يبي يجي يقدم عليهم

وبعدين ياخي وش خسران لو تراسلهم انت ؟

والله ثم والله ثم والله اني اول ما بديت ادرس برا قسم بالله ما عندي انقليزي ولا عندي الا الدجه

جبت واحد من خوياي يخثرد انقليزي وخليته يطقطق ويسأل

انا كنت انسخ كلامه وارسله لعده جامعات

وصلى الله وبارك

نصيحه لا تروح لهالمكاتب ابد


والله الموفق

تسلم لي والله يا مهند لا وأزيدك من الشعر قصيدة أنا تخصصي انجليزي يعني ما عندي أي مشكلة باللغة بس أنا كسول وأبي
كل شيء جاهز بس أحجز وعلى طول أطب عليهم وعلى فكرة أنا رايح أغير تخصصي من لغة انجليزية إلى إدارة أعمال ومحتاس
ولا أدري وش أسوي

طيب ياخوي انا قلت لك المكاتب ذي بتخسرك ماديا

وليت تخسرك ماديا على شيء يسّرك ويريحك ويشرفك

الا بتخسر على شيء يزودك حسره


انا اقول يا طويل العمر راسل بنفسك عشان تعرف وش لك وش عليك

خلني اقول لك قصه واحد من الشباب خذ ما بدا لك منها كعظه وعبره


هذا واحد الله ارزقه ببعثه وهو موظف بالتقاعد
وخيروه بين لندن واستراليا وكندا

وبعد مشوره رسا على لندن

وراح للمكاتب اللي تراسل الجامعات

وطلع لك هاك المصري اللي حمسه بالكلام

احنا واحنا وحنا

وهالمصري مشغل اسطوانه المدح بهالمكتب هذا

طبعا الرجال فلها واستانس
قال هذول هم اللي بيسنعوني خن اخليهم يراسلون عني

وعطاهم هاك الألفين وقال شوفوا شغلكم

وبعد شهر ونص جابو له قبول بجامعه

وراح الأخ الكريم للسفاره

وقالو له مقابله شخصيه

وفعلا دخل المقابله وتنشب له هاك العجوز البريطانيه

وخذ وهات من هالاسئله

وكان كل اسئلتهم تدور حول طبيعه الدراسه ،، وكيف راسلت الجامعه!!

وش عندك اخترت هالجامعه بالذات

طبعا الأخ بدا ينصب ويلفق قصص ويقول ان هالجامعه سمعتها طيبه عندنا ومن هالكلام !!


قالو خير ان شاء الله انتظر نص ساعه

وانتظر نص ساعه وبعد ما رجع يشوف وش صار بالفيزا ،، الا قالو مرفوض طلبك
ليه ياخوي ؟؟

قالو ان الجامعه هذي هي للكريستيان وانها بمدينه عريقه وقامو يعللون له سبب الرفض

اثري هالمصري عفى الله عنه جاب له قبول بجامعه لها شروطها الخاصه

والمصري هذا كذب عليهم ببيانات الشخص الراغب بالقبول

وقارنو بين مواصفات المقبول اللي بالورقه ومواصفات الشخص اللي يبي الفيزا على اساس هالقبول

وطلعت غير متطابقه

ولا كسب اي شيء

خسر مبالغ

وتسجلت بالسفاره البريطانيه انه لعاب<< يعني بيغربلونه اذا طلب فيزا ثانيه


والله المستعان


الحذر وانا اخوك

مشكور والله يا مهند وما قصرت وبصراحة قلبت راسي عليهم لك مني أزكى تحية